افغانستان او پاکستان د ترجیحي تعرفې هوکړه لاسلیک کړه
- 8 مياشتي دمخه (23/07/2025)
- سمسور نیوز
- 289
د افغانستان او پاکستان د صنعت او سوداګرۍ وزارتونو ترمنځ د ترجیحي تعرفې پر کمښت هوکړه لاسلیک شوه.
دا هوکړه د افغانستان د صنعت او سوداګرۍ وزارت معین احمدالله زاهد او د پاکستان د سوداګرۍ وزارت مرستیال جاوېد پاول ترمنځ په اسلامآباد کې لاسلیک شوې ده.
د صنعت او سوداګرۍ وزارت له لوري په خپره شوې خبرپاڼه کې راغلي، چې له دې هوکړې سره به دواړه هېوادونه د یو بل پر ټاکلو صادراتي او وارداتي توکو تعرفې راکمې کړي.
د دې هوکړې له مخې به افغانستان پاکستان ته پر څلورو صادراتي توکو — انګورو، انارو، مڼو او رومیانو — تعرفه له ۶۰ سلنې څخه ۲۷ سلنې ته راټیټه کړي.
همداراز، له پاکستانه به پر څلورو وارداتي توکو — ام، کینو، کېلو او الوګانو — تعرفې هم ورته کچه کې راکمې شي.
دغه هوکړه د یو کال لپاره نافذه ده؛ خو د دواړو هېوادونو د توافق او اړینو ارزونو له مخې کېدای شي تمدید او نور توکي هم ور زیات شي.
دا هوکړه داسې مهال لاسلیک کېږي، چې تر دې وړاندې د پاکستان حکومت د افغاني فصلونو پر وخت تعرفې لوړولې او کله ناکله یې بندرونه هم تړل، چې د افغان صادروونکو لپاره یې ستونزې رامنځته کړې وې.