سمسور

د افغانستان په ځینو ولایتونو کې د سېلابونو خبرداری ورکړل شوی

• 9 مياشتي دمخه (16/07/2025)
• سمسور نیوز
• 247

د ټرانسپورټ او هوایی چلند وزارت د هوا پېژندنې ریاست د افغانستان په یو شمېر ولایتونو کې د سېلابونو راوتلو د احتمال خبرداری ورکړی دی.

د یاد وزارت له لوري په خپره شوې خبر پاڼه کې راغلي چې سبا پنجشنبه (د چنګاښ ۲۵مه) په نورستان، کونړ، لوګر، پکتیا، خوست او پکتیکا ولایتونو کې د سختو بارانونو وړاندوینه شوې ده.

سرچینه زیاتوي، چې په لوېدیځو او مرکزي ولایتونو کې د تېزو بادونو، خاورو او دوړو د پېښېدو اټکل هم شوی چې سرعت به یې په یو ساعت کې له ۵۰ تر ۷۵ کیلو مترو پورې وي.

د یادونې وړ ده چې په افغانستان کې هر کال د بارانونو او سېلابونو له امله لسګونه کسان خپل ژوند له لاسه ورکوي، سلګونه استوګنیز کورونه او زرګونه جریبه کرنیزې ځمکې ویجاړېږي.

په وروستیو ورځو کې ورښتونو او سېلابونو د افغانستان په بېلابېلو په ځانګړې توګه ننګرهار ولایت کې خلکو ته مالي او ځاني زیانونه اړولي دي.